Aukning á ýsuveiðum.

Það hefur nú "kostað klof að ríða röftum" í þessu máli og ekki allt mjög hagfellt framtíðinni. Fyrir það fyrsta er nú ekki nokkur vegur að bera saman síðasta ár við önnur hvað flotan varðar sem í ýsuna sækir. Öll endurnýjun síðustu ára á "bátaflotanum" hefur farið í að smíða og flytja inn notaða óvígan her af togurum sem beitt er í  fjörur hér við Suðurströndina, hvar allt er opið, sumstaðar uppí sand fyrir dragnótina.

Þessi skip eru kölluð bátar og eru að koma inn fyrir báta, en hafa afköst við veiðar eins og "minni" togararnir höfðu milli '70 og '80 og það þótti ekki ástæða, eðlilega, til að beita þeim í fjöruskrap uppá 3 sml. heldur hafa þeir fiskað utan 12 mílna, þar til nú að farið er að stytta þá og "skrá niður" vélarafl til að koma þeim á grunnslóðina líka, með hinum togurunum. Ég fullyrði, að þessi dapurlega þróun á eftir að bíta illilega þegar fram líða stundir.

Annað sem ekki hefur verið hagstætt framtíðinni eru veiðar stærstu línuskipa uppí fjörugrjót víða þar sem þeir hafa verið að berjast við að ná ýsu vegna niðurskurðar í þorskkvóta. Þar hefur meðaflinn oftar en ekki verið afar smár þorskur sem ekkert erindi á á krókana, hvort sem hann fer ofaní lest eða fyrir borð aftur. Það hefði verið hagfelldara að hafa þorskkvótan stærri, eins og fullt tilefni er til, enda nægur þorskur um allan sjó, svo þessi afkastamiklu línuskip gætu verið að gera það sem þau eru best í, að fiska þorsk á dýpra vatni.

Til þess að koma öllu þessu í kring var farið niður með lengdarviðmið ýsunnar varðandi hvenær lokað er fiskislóð þar sem skipin eru að veiða ýsu. Sem þýðir aftur að megnið af þessari ofsaveiði af ýsu hefðum við aldrei fengi frið til að stunda hérna áður fyrr, það hefði öllu verið lokað fyrir veiðum. Ég er hinsvegar ekki að segja að sú breyting sé alvond, en samfara þessari togaravæðingu grunnslóðarinnar er hún afleit.

Það væri hægt að fara miklu dýpra í þetta mál en tími er til eða staður hér á blogginu og vonandi verður það gert einhversstaðar, en það er ekki mikill sómi að þessari umgengni um auðlindina, því miður.

Íslendingar aldrei veitt meira af ýsu

Athugasemdir

[Jóhann Elíasson, 3.9.2008 kl. 09:45]

Með þessari færslu "hittirðu sko heldur betur naglann á höfuðið", nema hvað ástandið er miklu VERRA en þú dregur upp.  Þessi "endurvinnsluskip" fiska alveg gríðarlega mikið og eru með mikinn "meðafla" og vegna kvótans fer ALLUR "meðafli" aftur í sjóinn og er allt það magn engum til gagns, nema náttúrulega hræ ætunum. nú er nýhafið nýtt fiskveiðiár, sem ég held, að verði enn verra en það sem var að enda, Sjá hér.

[Hafsteinn Viðar Ásgeirsson, 3.9.2008 kl. 10:44]

Takk fyrir það Jóhann. Ég held það sé rétt hjá þér skepnuskapurinn er gríðarlegur í þessu og einungis hugsað um stundarhag. En öllu stjórnað af skrifborði FAJ hjá LÍÚ, allt í þeirra boði, enda hafró stjórnað þaðan í einu og öllu og árangurinn eins og allir geta séð sem vilja skoða þetta með opin augun.