"Slær mig ekki út af laginu"

Segir Ferguson og segist hafa séð þetta allt áður. Chelsea og þar áður Arsenal, breytir engu við verðum að takast á við það þegar þar að kemur.

Og ef Ferguson segir það þá er það bara þannig og málið dautt.

Ferguson hefur engar áhyggjur

Norar geta nú sennilega sofið rólegir.

Hann Eiður Smári er nú fyrir það fyrsta ekki í neinni leikæfingu og þess utan þarf hann einhverja með sér trúi ég og það er ekki um auðugan garð að gresja. Þó er aldrei að vita nema menn geti komið á óvart með hraðaupphlaupum.

Norðmenn óttast Eið Smára

Þetta er náttúrulega bara geggjað.

Og svo er verið að kvarta undan kostnaði við að rúlla þessum trukkaófreskjum um landið. Það er greinilegt að það þarf að snúa eitthvað meira út þar í gjöldum, þetta getur ekki átt að vera hagkvæmt.

Ekið norður með verksmiðju í 60 gámum

Til stuðnings ljósmæðrum.

http://www.youtube.com/watch?v=9k6AF7p3LdM

Hélt nú að hann Kubica væri skynsamur strákur.

En þarna afsannaði hann það hressilega. Það er náttúrulega ótrúlegt annað en að þetta fari að ganga hjá honum Hamilton og sannarlega á hann skilið að vinna í ár og gerir að öllum líkindum.

Kubica: Massa líklegastur til að verða heimsmeistari

Bjöggi ekki í góðum málum.

Þetta virðist ætla að verða vandræðamál og ég gæti trúað að það yrði snúið að finna nothæfan stjóra á Englandi, sérlega ef menn telja að þeir muni ekki fá neinu ráðið. Kannski þarf bara Bjöggi engan, gæti alveg trúað að hann gæti þetta sjálfur?

Redknapp fer ekki til West Ham

Þarna þekkjum við Árna.

Nákvæmlega svona virkar hann, að geta ráðist í hlutina af djöfulmóð og hringja í mann og annan til að láta eitthvað gerast, akkúrat Árni Johnsen, svona þekki ég hann. 

Gott mál sem ástæða er til að óska öllum sem að komu til hamingju með. En illa klikkaði Lýsing á frábæru tækifæri til auglýsingar, en það er þeirra mál, þeir vilja heldur styrkja fjölmiðlana...

Þetta er eins og að fá fæturna aftur

Ekki ótrúlegt að þarna sé búið að koma sér í vandræði.

Yfirgangur LÍÚ er með eindæmum þar sem því verður við komið. Þetta virkar fínt hjá þeim á Íslandi því hér eru heilu stjórnmálaflokkarnir í vinnu fyrir þá auk Hafrannsóknarstofnunar þar sem allir dansa eins og strengabrúður eftir þeirra höfði. Það endar hinsvegar sennilega með því að einhversstaðar koma þeir sér útúr húsi með andskotans frekjunni og þá er ekki víst að Haarde geti skorið á hnútinn.

Það er ljóst að öll umræðan í Noregi er á einn veg, að þarna fari Íslendingar enn eina ferðina fram með frekju og yfirgangi og moki upp rándýrum manneldisfiski í gúanó eins og skít.

Vilja banna innflutning á mjöli og lýsi frá Íslandi

Hann Harry Redknapp er ekki á lausu.

Og örugglega ekki í svona víking. Hann mundi sennilega þurfa menn í liðið og það er eitthvað sem Bjöggi telur ekki þurfa núna. Mjög finnst mér ótrúlegt að það fáist nothæfur maður til að stýra þessari hjörð eins og andrúmsloftið virðist vera þarna.

Curbishley: Átti ekki annarra kosta völ en að hætta

Aukning á ýsuveiðum.

Það hefur nú "kostað klof að ríða röftum" í þessu máli og ekki allt mjög hagfellt framtíðinni. Fyrir það fyrsta er nú ekki nokkur vegur að bera saman síðasta ár við önnur hvað flotan varðar sem í ýsuna sækir. Öll endurnýjun síðustu ára á "bátaflotanum" hefur farið í að smíða og flytja inn notaða óvígan her af togurum sem beitt er í  fjörur hér við Suðurströndina, hvar allt er opið, sumstaðar uppí sand fyrir dragnótina.

Þessi skip eru kölluð bátar og eru að koma inn fyrir báta, en hafa afköst við veiðar eins og "minni" togararnir höfðu milli '70 og '80 og það þótti ekki ástæða, eðlilega, til að beita þeim í fjöruskrap uppá 3 sml. heldur hafa þeir fiskað utan 12 mílna, þar til nú að farið er að stytta þá og "skrá niður" vélarafl til að koma þeim á grunnslóðina líka, með hinum togurunum. Ég fullyrði, að þessi dapurlega þróun á eftir að bíta illilega þegar fram líða stundir.

Annað sem ekki hefur verið hagstætt framtíðinni eru veiðar stærstu línuskipa uppí fjörugrjót víða þar sem þeir hafa verið að berjast við að ná ýsu vegna niðurskurðar í þorskkvóta. Þar hefur meðaflinn oftar en ekki verið afar smár þorskur sem ekkert erindi á á krókana, hvort sem hann fer ofaní lest eða fyrir borð aftur. Það hefði verið hagfelldara að hafa þorskkvótan stærri, eins og fullt tilefni er til, enda nægur þorskur um allan sjó, svo þessi afkastamiklu línuskip gætu verið að gera það sem þau eru best í, að fiska þorsk á dýpra vatni.

Til þess að koma öllu þessu í kring var farið niður með lengdarviðmið ýsunnar varðandi hvenær lokað er fiskislóð þar sem skipin eru að veiða ýsu. Sem þýðir aftur að megnið af þessari ofsaveiði af ýsu hefðum við aldrei fengi frið til að stunda hérna áður fyrr, það hefði öllu verið lokað fyrir veiðum. Ég er hinsvegar ekki að segja að sú breyting sé alvond, en samfara þessari togaravæðingu grunnslóðarinnar er hún afleit.

Það væri hægt að fara miklu dýpra í þetta mál en tími er til eða staður hér á blogginu og vonandi verður það gert einhversstaðar, en það er ekki mikill sómi að þessari umgengni um auðlindina, því miður.

Íslendingar aldrei veitt meira af ýsu